政情：梁美芬夫婦互補性弱點？
本身係法律博士嘅立法會議員梁美芬用咗成年時間，嘔心瀝血寫咗本二百幾頁嘅「巨著」，諗住勉勵放榜學生積極面對前路。點知本書頻頻出現錯字，學生睇咗呢本書，相信真係多得梁博士唔少。
新書勉學子錯字連篇
博士喺書中大談同夫君「以先（前）」相識嘅經過，又讚夫君為人「埋（坦）蕩蕩」，二人感情分屬「逝（細）水長流」。雖則夫婦二人性格有異，「也許由於我們成為對方性的弱點的補足，所以才可以走在一起」，有關內容雖然可以主觀理解為二人性格互補，但博士系出法律，遣詞用字當然十分小心，梁博士如斯大膽公開夫妻閨房密事，簡直係爆炸性到難以置信。為免遭人話佢「拖跨（垮）」道德水平，下次「埋蕩蕩」前都係包番個膠袋穩陣啲。
梁博士新書「遏（竭）盡所能」咁成為立法會尋日茶餘飯後嘅話題，唔少議員仲非常「抗（亢）奮」咁笑個唔停，如果梁博士睇到此情此景，相信佢都會始料不及。以上引號內嘅句語亦係博士新書中出現嘅錯別字。不過，睇怕多數都係校對出錯，睇嚟梁博士都要跟跟單嘢喇！