政情：授勳大細超貪曾惹公憤
貪曾七一卸任後拍拍屁股離港，但留番啲蘇州屎畀現屆政府，好似佢最後一次拍板嘅授勳名單就疑似「大細超」，據聞激嬲咗唔少人士及組織。好似近年較具規模嘅名人二代組織百仁基金及菁英會，近年做咗大量青年工作，但授勳名單上完全無佢哋份，反而香港青年聯會就有人獲頒銅紫荊星章及獲委太平紳士，咁大細超當然惹人不滿啦！授勳變成分化，貪曾真係害人不淺。
好多人都知道貪曾親疏有別，近年鍾意頒晒啲勳章畀自己友，對於一啲默默耕耘嘅組織，就視而不見。近年負責做青年工作嘅大組織都有好幾個，包括菁英會、香港青年聯會及百仁基金，但今年授勳名單入面，菁英會及百仁基金嘅成員只係得個望字，聽聞佢哋都有唔少不滿，覺得自己做咗幾年青年工作，如今連個桔都無，個心點都有少少唔舒服。
幫CY搞選舉活動遭報復？
自從不滿授勳嘅聲音傳出後，好多人都就此議論紛紛，揣測箇中因由。有知情人士聽聞，只要捐咗錢就有得受勳，但只搞青年工作而唔捐錢，就要等到明年先有份補攞勳章。有人仲分析，貪曾向來同梁振英（CY）對着幹，喺西九比賽評審風波及新政府架構重組過程中暗中搞亂檔，咁啱百仁基金同菁英會又喺之前特首選舉幫過CY搞過活動，唔通貪曾因為呢個原因就唔向佢哋嘅成員授勳？
講到尾，授勳只不過係一個分餅仔活動，雖然真正意義不大，但對於一啲對社會有貢獻嘅青年或組織嚟講，都算係一種鼓勵，貪曾臨走都要玩分化，真係反映到佢份人心胸狹窄。
其實今次事件除咗涉及貪曾外，前政務司司長林瑞麟作為授勳委員會主席，都要負上責任，而專責青年事務嘅民政事務局局長曾德成，處理推薦名單更加責無旁貸。