中環出更：孫道弘打造攝影交流園地
為咗推廣攝影文化，富士攝影董事總經理孫道弘（Stanley）喺銅鑼灣開設咗間照相館，提供器材講解、相片沖印、作品展覽及攝影講座服務等，成為廣大攝影發燒友嘅交流園地。照相館前日正式開幕，新世界發展執董鄭志剛（Adrian）及一眾青年才俊齊到賀，彼此分享有趣嘅攝影體驗。
名人分享照相經驗
名媛鄭詩韻（Michelle）同夫婿陳鴻業話，佢哋對攝影嘅熱誠係源於囝囝誕生，尤其係長子呱呱落地後，影低小生命生活點滴，就連囝囝嘅手指腳趾，都影得不亦樂乎，仲製作成日曆廣贈親朋添。Michelle又話，佢兩歲嘅長子已識得揸住相機四圍拍攝，雖然亂影一通，但佢哋都視為囝囝嘅成長印記。
紹榮鋼鐵後人龐心怡（Samanta）就話，當佢夢熊有兆後，佢老公就更加留意攝影科技嘅最新發展，務求以最好嘅器材為小生命留下最美好回憶。佢仲話要喺分娩之前，為身懷六甲嘅身材留影，因為自己個肚比老公肚腩還要大嘅日子實在好罕見喎。
至於Samanta嘅生意拍檔、南區區議員馮仕耕都對攝影有研究，但由於佢醉心美食，所以都係攝影食物居多。社交名人周國豐就好謙話自己嘅攝影技術差強人意，咁耐以來只有泰國嘅旅行相可以見得吓人。對於數碼攝影普及化，Stanley仍然緬懷菲林時代，事關數碼攝影如何改進，最終目的都係想達到菲林嘅效果喎。
卓妮