政情:黃錦星同溥儀十足餅印

環境局局長黃錦星(KS)尋日第四日返工已經畀網民惡搞,有人將佢張相同清朝末代皇帝溥儀放埋一齊,嘩!兩人真係有九成九相似,唯一唔同嘅應該係溥儀啲頭髮比KS多好多。

KS、食物及衞生局局長高永文及發展局局長麥齊光三位新局長尋日首次到立法會開會,高永文回答議員質詢嘅表現就得到最多議員讚好,工聯會葉偉明話,可能因為高醫生以前做醫管局行政總裁時都有去吓立法會開會,所以表現都算唔錯。議員陳克勤就話KS嘅表現尚算四平八穩,但就提醒佢要加把勁「咪書」刨熟啲環境政策,唔好頻頻睇貓紙喎。

至於麥齊光答問題時就咳到無時停,連議員劉慧卿都要暫時收火叫佢保重身體。自由黨劉健儀更加話麥齊光讀稿慢,又話佢掌握唔到質詢嘅問題核心。順帶一提,政務司司長林鄭月娥尋日去立法會時畀大批記者包圍引起混亂,仲整歪咗喺走廊嘅畫像添。

第一手消息請下載on.cc東方互動iPhone/iPad/Android/Windows Phone Apps

搵樓18即睇最新樓價走勢、最全面地產新聞及筍盤情報