新政府架構重組逐步成形，一批副局長人選除咗已知嘅民政事務局副局長許曉暉、財經事務及庫務局副局長梁鳳儀外，環境局局長黃錦星（KS）尋日亦透露遴選委員會畀咗兩個副局長人選佢揀，佢亦已揀定只欠公布。據聞兩人分別係世界自然基金會香港分會氣候項目主管余遠騁及港大傳訊及公共事務處高級經理何建宗，其中何建宗機會較大。
KS爆料都唔係第一次，上次佢洩露政府新班子名單嘅公布日期，今次就爆料話自己揀定副局長，佢盛讚余遠騁同何建宗兩個都係有心有力，仲話最關鍵係考慮對方能否同佢互相配合、互相補足喎。不過，余遠騁尋日就話「無消息！」更暗示可能唔係佢做。至於何建宗就話：「依家唔方便講，等正式公布！」然後就匆匆收線，睇嚟呢個似係喇。
另外，教育局副局長亦傳出疑似人選，佢就係現時教育局副秘書長陳嘉琪，究竟係真唔係，相信好快就知道。