貪曾禍港七年，任內施政劣迹斑斑，七一卸任後即時落荒而逃，即晚已同太太上機到美國三藩市。不過，咪以為走得快就好世界，有消息話貪曾喺飛機上先遇到抗議，佢以為揮手致意就了事，但飛抵三藩市時，又有八十後青年恭候貪曾，高舉並高叫「曾蔭權，你出賣了香港自由、民主及未來」嘅標語，據聞貪曾見到即刻黑面，然後揮手離去。貪曾去到彼邦都遇到抗議，有幾乞人憎可見一斑。
貪曾呢次遠走三藩市，表現依然閃縮且目中無人。有知情人士話，貪曾同太太、友人一行三人前赴三藩市，咁啱得咁蹺今次服務貪曾嘅某名空姐，原來係第二次服務佢，但貪曾竟然唔認得人哋，認真失禮。
當抵達三藩市後，貪曾繼續疑似大搖大擺，喺當地人員護送下經特別通道離開。
不過，要數最離奇巧合嘅事情，反而係有人聽聞香港駐三藩市經濟貿易辦事處處長梁永恩，突然喺呢段時間放咗一個星期大假，無乜同事知道佢去咗邊度，莫非佢突然放大假同貪曾到三藩市有關？