政情：吳克儉一世人喊得四次？
返咗工兩日嘅教育局局長吳克儉，尋日喺一個電台節目上再次講到對六四嘅睇法，佢覺得係一件不幸嘅事，仲話自己一世人只係喊過四次，六四係其中一次，無論個背景係點，都係唔開心嘅事喎。BB仔一出世就喊到拆天，無奶食又喊、瀨尿又喊，就算大個考試成績差或失戀都可能會喊喎，所以點會一世人喊四次咁少呀？有機會真係要問吓佢。
不過，講到尾吳克儉都無回應係咪支持平反六四，只係強調歷史會有交代，又話六四喺乜嘢角度都可以公開討論，連考試及評核局以前都有出過相關題目，證明仲有言論自由喎。有聽眾就將六四事件同南京大屠殺拉埋嚟講，問佢應唔應該譴責事件，吳克儉就話應該，但再問到六四事件就支吾以對。問到民運人士李旺陽離奇死亡事件，吳克儉多番強調，話事件有好多疑點，有需要深入及全面調查。