中環出更：「活化」徐悲鴻駿馬 全球首創
前年喺亞洲博覽館展出嘅《清明上河圖》動畫好評如潮，有「現代中國繪畫之父」稱號嘅已故美術教育家徐悲鴻，其多幅真迹亦喺尋日同今日假香港大會堂展出，其中更展出全球首創嘅「悲鴻駿馬動畫」，將大師嘅十三幅畫作活化重現，唔少政商名人都去先睹為快。
施子清寫大字助興
呢幅「悲鴻駿馬動畫」高兩米、闊八米，當中包括九匹駿馬、雀鳥及喜馬拉雅山等大自然風景，仲配合埋馬匹嘅叫聲，令畫作煥然一新。裕華國貨董事長兼總經理余國春、鄉議局主席劉皇發、全國政協委員施子清等擔任開幕禮嘉賓，擅長書法嘅施子清仲大筆一揮，寫咗「翰墨傳承」四個大字添！
「悲鴻駿馬動畫」仲會喺本月十八及十九日於香港書展期間，由上午十時至晚上十時於灣仔會展中心會議室N201A再展出。主辦今次畫展嘅青年協會仲會於本月七日舉行「千人自由畫馬拉松」以傳承及發揚中華文化。