中環出更：光哥退休外遊打高球
新政府上場後，多名卸任嘅局長無官一身輕，終於可以放悠長假期，享受人生。除咗前運輸及房屋局局長鄭汝樺話會密密去旅行外，七‧一當日，前保安局局長李少光（光哥）已隨即約埋前高官馬時亨（肥亨），飛赴雲南昆明打波歎世界。前日下午，卓妮又見到前教育局局長孫明揚同太太鍾小芬喺中環ifc逛超市，難得咁悠閒。
終於唔使理會香港嘅大小保安事務，光哥退休後第一件想做嘅事係乜嘢？原來都係佢最拿手嘅高爾夫球。卓妮七‧一當日見佢一身輕便裝束，帶齊球具行李到機場貴賓室，揮揮衣袖遠離香港，都幾瀟灑。同行嘅肥亨與光哥一向係球場上嘅好朋友，兩人球技都有番咁上下水準，此行一定玩得好盡興喇！
孫氏伉儷買餸煮飯仔
到咗前日新政府上場第一個工作天，班高官新貴忙到氹氹轉嘅時候，孫公就喺下午三點幾鐘，同太太現身ifc間超市買嘢。卓妮見孫公推住架購物車，好閒適咁慢慢行，期間買咗些少凍肉，又彎低身仔細揀乳酪，但最終都係睇多過買。孫太話，孫公無戒口，乜都食，當日特登買餸返屋企煮飯仔，炮製牛柳絲飯，勝在簡單喎。
講開又講，光哥同肥亨係前高官，並非人大代表、政協委員或立法會議員，亦無攞過大紫荊勳章，佢哋以乜嘢身份用機場貴賓室上機呢？但仲有一個可能性嘅，就係跟大隊出發喇。
卓妮