政情：甘威買相機驚老婆鬧？
立法會快將換屆，打算放棄連任嘅立法會議員甘乃威（甘威）變得好清閒，最近買咗部新相機，拉埋啲好友喺立法會影相留念。佢嘅黨友張文光就爆料話，甘威耐唔耐就話買咗閃光燈呀、鏡頭咁，直情好似細路仔買玩具咁。我哋見甘威部單鏡反光相機係最新型號，但佢就點都唔肯講買咗幾多錢，唔通佢係小男人驚貴得滯怕畀老婆鬧？
甘威買咗新相機後，近日經常喺立法會內周圍影相，尋日仲同張文光兩個人靜靜雞去咗立法會平台花園度遊玩。我哋就八卦吓甘威部相機幾多錢啦，點知佢懶神秘話係機密喎！不過，我哋睇資料就發現部相機係今年嘅最新型號，機身連鏡頭要三萬四千多元，買埋支閃光燈及配件就使咗半份議員薪酬，唔怪得佢話係「機密」喇。