曾蔭權真係好鬼死鍾意遊埠㗎，七月一日卸任之前固然係一個熱愛周遊列國嘅離岸特首，仲要餐餐浪費公帑入住總統套房，執完包袱卸任之後又第一時間搭飛機外遊。咦咦咦，咪住先，貪曾正在接受廉署調查㗎喎，會唔會……弊，小心呢一個政壇蠱惑仔潛逃！
前日朝早七點鐘，曾蔭權孖住老婆鮑笑薇，乘坐政府車輛由入住嘅港島香格里拉酒店，前往灣仔金紫荊廣場出席升旗禮同新特首就職禮。搞咗半日之後，去到前晚十時五十分，已經成為過氣特首同過氣第一夫人嘅貪曾夫婦，鬼鬼祟祟從酒店地牢貨物起卸區登上政府車輛直奔機場，乘搭尋日凌晨開出嘅航班離開香港。去邊呢？唔知喎，總之就係披星戴月火速離港，走得滾水淥腳咁嘅款。
講到入住酒店，呢家嘢又睇得出貪曾嘅算死草性格。由於禮賓府要騰出嚟畀新特首做新主人吖嘛，所以必須自己畀錢搵個地方落腳，煲呔選擇入住一個普通房間，每晚房租三千幾元，慳得就慳。
大家記唔記得呢個「中環民國大總統」出外公幹入住嘅總統套房，房租係幾銀呀？盛惠每晚五萬四千元，隨時係低收入窮鬼一年嘅薪金。亦即係話，用公家錢就闊綽，用私己錢就慳家。正如城大持續專業進修學院學術統籌宋立功話齋：「佢數口認真精，在任時用公帑外訪，就住房租數以萬元計嘅豪華套房，依家要自己真金白銀付錢，就咁孤寒！」
講番貪曾浪費公帑嘅舊帳吖，第二個五年任期之內瘋狂豪華外訪五十五次，納稅人帳面付出超過千萬元。原來條數唔止咁樣計㗎，好多開支隱藏於其他部門帳目，例如政府新聞處，由於要派員隨從特首、政務司司長以及財政司司長外訪，單係二○一一年就用咗三百一十萬元，增長以倍計。冇辦法啦，曾蔭權卸任之前盡地一貪，開支增長極快，一闊三大之下，新聞處都要陪佢燒銀紙。
講到呢度，功夫茶有必要再一次提醒廉政專員公署，調查人員請記住曾蔭權爵士捲入大量貪腐醜聞，部分好可能涉及刑事罪行。首先，固然要繼續深入調查啦，有證有據就秉公辦理，香港人絕對唔介意見到貪官踎監。其次，留意貪曾伉儷有冇着草嘅企圖，一有乜嘢風吹草動就要張開天羅地網，務求將潛逃人士緝拿歸案。再者，熟讀各國引渡條例以備不時之需。
無論如何，曾蔭權卸任不代表貪腐事件告一段落，反而應該依法處理，還香港人一個公道。喂，香港勝在有你同ICAC吖嘛，千祈唔好話畀功夫茶聽，連呢一個核心價值都破壞咗呀！