港鐵甩油漆 乘客中招
「嗰日行行吓突然有啲嘢飛落我啲頭髮度，真係嚇咗一跳，點知原來係甩油！」吳小姐習慣於第一城站乘搭港鐵上班，事發後發現車站B出口天花電線槽多處油漆剝落，但從未見職員維修，不滿港鐵「價照加，服務照差」。
港鐵發言人表示，接獲轉介後即作出了解，證實該站職員早前巡查時已察覺天花電線槽油漆披口情況，為免碎片散落地面，已安排維修剷走披口部分，並對有關情況加以留意。發言人又稱，現時經職員視察及檢查後，已確定該電線槽穩固安全。
「淨係剷走啲披口就算，點解唔直接做一次全面油漆翻新？」吳小姐不滿港鐵「做啲唔做啲」，無視乘客安全，指除第一城站外，沙田圍站亦有同類情況，要求港鐵正視。