政情：小明封咪轉行理髮？
「小明醫生」李家仁啲歌喺網上熱爆後，已經打響名堂，最近有人發現，小明喺英國開理髮店，唔知係咪佢唱歌唱厭咗想轉行，定係有人用咗佢個名開檔？李家仁話，佢有個死黨最近去英國開會，經過唐人街嘅Shaftesbury Avenue，見到有間樓上理髮店叫做「小明理髮」，於是影低傳畀佢睇吓。
有人叫李家仁將「小明」個名註冊，但佢覺得個名咁普通，隨街都係，邊有得註冊？不過，佢知道有呢間理髮店後，都諗住叫幫襯開嘅理髮師傅諗諗，將來有機會自立門戶開檔嘅話，就用「小明」做舖名，仲答應到時去剪綵添。
又到放暑假旅遊旺季，問李醫生會唔會去倫敦幫襯吓呢間理髮店？佢話七、八月撞正倫敦奧運，點敢去呀！