中環出更:鄭志剛推金鑽套餐

龍年雙春兼閏月,旺婚嫁、旺丁之餘,仲旺財。新世界發展主席鄭家純公子鄭志剛(Adrian)睇準商機,推出周大福金鑽婚嫁首飾套餐,連金飾同鑽飾,畀三萬八千八百八十八港元意頭價就掂。Adrian工作出名勤奮,絕無富家子習性,尋日佢就出席全國青聯喺灣仔會展舉行回歸十五周年座談會,以全青副主席身份發言,認真畀面。

Adrian近排忙於推銷旗下新樓盤,忙到瘦咗幾磅,但愈忙愈high,婚嫁首飾市場,都畀佢度到絕世好橋,以靚價「包裝」準新娘,等佢哋嫁得有陣勢。由於工作太忙,Adrian嘅充電大計都要推遲到八月,佢話好想同太太暢遊中東及西歐,遠離煩囂都市。

陳仲尼訂晒飛睇倫奧

同屬全國青聯副主席嘅陳仲尼(Rock)都計劃暑假出門,遊倫敦睇奧運,順便帶一對兒子參加遊學班。阿Rock已經訂晒飛睇跳水、乒乓球比賽及閉幕禮,節目豐富。今次奧運盛事,雖然訂飛唔難,但酒店住宿費就相當貴,住一晚要成八、九千港元,貴過平時三、四倍喎。

座談會上,仲有唔少富二代,包括立法會議員梁君彥公子梁宏正、中華出入口商會副會長許華傑、廣東社團總會主席王國強公子王紹基,仲有冧莊做香港青聯主席嘅葉振都及立法會議員陳克勤,夠晒熱鬧。

卓妮

第一手消息請下載on.cc東方互動iPhone/iPad/Android/Windows Phone Apps

搵樓18即睇最新樓價走勢、最全面地產新聞及筍盤情報