本身係荷蘭人嘅公民黨南區區議員司馬文早前有意參選九月立法會區議會超級議席，但就被公民黨基於佢仲未攞到中國護照為由拒絕。
不過，世事就係咁奇妙，司馬文話佢前日收到入境處通知批准佢嘅入籍申請同發出入籍證書，下一步就會同個黨商討，希望佢哋會派佢出戰超級議席。
不過公民黨黨魁梁家傑（Alan）就話，上次召開嘅特別會員大會已經決定唔派人參選超級，佢哋會喺下個星期二開執委會時再傾呢個問題，睇下會唔會推翻上次決定。但Alan承認重新畀司馬文參選嘅程序比較複雜，佢仲大鬧入境處突然轉軚好明顯係「玩嘢」，話佢哋打亂晒公民黨嘅選舉部署。加快批出都要鬧，依家啲人乜真係可以惡成咁？
如果司馬文最終參選，最大受害者將會係現時形勢落後嘅民主黨涂謹申。阿涂話泛民如果真係派出四席，分分鐘會分薄票源，不過佢對公民黨甚有信心，話公民黨最終一定會以大局為重喎。