笑看天下:貪曾如廁也帶刀子

曾蔭權爵士「貪性難馴」,卸任在即,貪腐醜聞依然如煙花連串爆開,燦爛閃亮維港的上空!私吞天價茅台,公帑建酒窖,紅酒多到足以浸紅維港,貪曾真係想唔「名留千古」都難矣!一息尚存,港人都忘不了你!

一個貪威識食嘅特首,揚言「做好呢份工」,吹水「福為民開」,實質嘅版本係「舔盡份好工」,「福為己開」,一晌貪歡,最愛離岸住向海總統套房,歎足「有權不用過期作廢」嘅配額,咁做好份工,試問香港市民又點會幸福及有運行啊!

本報「探射燈」又同佢計數,貪曾亂政七年,窮人激增並突破一百二十萬大關,所謂「群策創新天」,就係「六大產業,不見成果」,扶貧「廢到無倫」,百億關愛基金爛尾成效低,反映貧富差距嘅堅尼系數,由○六年嘅零點五三三,上升到現時接近臨界點嘅零點五三七,最窮與極富者之間嘅收入差距,相差高達四十五倍!最低工資立法佢又認屎認屁,大佬啊,基層收入「有保障」咁又如何?敵得過百物騰貴、通脹房租嘅升幅嗎?唔好話基層頂唔順,中層無殼蝸牛一樣喊晒救命!

「邦有道,貧且賤焉,恥也。」這話出自《論語‧泰伯》,大意是說一個國家有進步的社會制度,而其人民卻過着貧窮生活,這將是該國的恥辱!當然,同貪曾講聖賢之道,衰過對牛彈琴,皆因喺佢嘅人生字典,根本無「恥」字,一心是貪,想像中他是如廁也帶刀子,為的是嚇唬拾糞的!