政情：梁展文現身新世界 耐人尋味
退休後一度加入新世界中國地產、被指有利益衝突引起軒然大波嘅前房屋及規劃地政局常任秘書長梁展文，事發後離開過新世界後一段時間，其後又迂迴為新世界提供服務。我哋尋日喺中環新世界大廈發現梁展文嘅蹤影，最巧合係新世界主席鄭家純（純官）尋日亦約咗多間傳媒喺新世界大廈大本營做訪問，梁展文嘅出現真係耐人尋味。
梁展文去年四月被傳媒踢爆透過成立顧問公司，為新世界中國嘅母公司周大福企業提供服務，但事件因為佢已經過咗退休公務員再就業「冷河期」多時而不了了之。事隔一年多後，久未露面嘅梁展文尋日約下午五時途經新世界大廈大堂，見佢多次周圍望，對鏡頭十分敏感，但不消一會後又折返新世界大廈，喺不足五分鐘時間內兩次現身大堂。
本來梁展文為周大福服務，喺新世界大本營出現都無乜特別出奇，但最巧合係純官喺差不多時間約咗傳媒做訪問，究竟係咪巧合，相信只有兩位當事人先至知喇！