政情：栢志高呻做到似隻狗
近年房屋問題激發社會好多怨氣，身兼房委會副主席嘅房屋署署長栢志高自言受到唔少壓力，佢尋日喺今屆政府最後一次房委會例會上突然大吐苦水，借用英國經典組合「披頭四」嘅名曲「A Hard Day's Night」歌詞，自嘲每日做到隻狗咁，返到屋企就瞓到隻豬或碌木咁，呻到樹葉都落埋，唔通佢想學房屋及運輸局局長鄭汝樺（Eva）咁退休歎世界？
栢志高回顧過去幾年工作，感慨話估唔到呢份工咁大壓力，但自己會以「不畏艱辛、迎難而上」嘅精神做好份工，又大讚即將退休嘅頂頭上司Eva處事認真又有幽默感。
最後一次主持會議嘅Eva亦好感性，臨別贈言時除咗力讚栢志高盡忠職守外，仲寄語下任房委會主席，話呢個位任重道遠，希望委員好好支持主席喎。盛傳出任新任房屋規劃及地政局局長嘅張炳良隨即主動發言，仲向Eva大笠高帽，讚佢做事有心又關懷市民，佢哋會後仲即刻企埋密斟，唔通Eva同張炳良傾緊交接工作？