中環出更:獲榮譽院士 鄧梅芬喜上眉梢

旨在提升本港商業專業服務水平嘅商業專業評審中心,尋日喺理工大學舉行頒授典禮,新任會長百成堂集團主席李應生及副會長余壽寧等齊主持儀式。獲頒榮譽院士嘅位元堂藥業控股執行董事鄧梅芬(Karen)喜上眉梢,奶奶及留學畢業返港嘅姪仔Brian都齊齊去捧場。

Karen透露,近日忙於物色高質素中醫師,原來其公司除咗有中西藥產品零售外,仲積極發展中醫診所,現已有兩所營業中,希望今年開夠四間。但Karen坦言香港缺乏中醫人才,需北上揀蟀。身材健美嘅Karen仲分享美容心得,就係每朝飲自製五青汁,同埋勤做高溫瑜伽,最重要係保持心情開朗喎!

曾裕變髮趕潮流

獲頒榮譽院士嘅仲有現代美容主席曾裕(Joyce),佢老公李守義都戥佢開心,已經訂好枱慶祝。Joyce話,下月會去北京同新加坡,因為兩地都有分店開張,去剪綵嘅同時順便度假喎!一向跟貼潮流嘅Joyce將會轉look,將一頭紅髮染成紫黑色,皆因佢係Chanel迷,今季品牌大熱紫黑、金色同綠色,髮色都要與時並進,真係潮。

至於太子珠寶鐘錶執行董事朱繼陶係首次獲頒榮譽院士,太太鄧麗萍、千金朱紫嬈、公子朱國良夫婦總動員現身支持。朱太童心未泯,借咗老公頂院士帽戴,仲舉起勝利手勢影相添,唔通佢又想着袍?原來朱太年前已經攞咗呢個銜頭,佢幽默話,係老公有風度先讓佢啫!

卓妮

第一手消息請下載on.cc東方互動iPhone/iPad/Android/Windows Phone Apps

搵樓18即睇最新樓價走勢、最全面地產新聞及筍盤情報