中環出更：梁太遇曾太 衣着兩極
候任特首梁振英（CY）同貪曾今日將雙雙赴京出席回歸十五周年成就展，佢哋嘅老婆尋日亦喺一個慈善活動上碰頭。不過，兩位阿太尋日都無乜交流，會後只係循例握下手寒暄兩句，咁又係嘅，齋睇衣着都知佢哋走唔同路線啦，唯一相同嘅可能係，佢哋對於自己老公嘅負面新聞都係封口唔講。
一個較隆重 一個續穩陣
曾太鮑笑薇可能自知背負貪曾太太名銜，尋日衣着繼續穩打穩紮，以一身平實啡色套裝上陣，沉實得嚟又帶一絲卸任嘅黯然，曾太頒感謝狀畀屆滿董事媽打李麗娟嘅時候，仲忍唔住同媽打來了個擁抱，好似好唔捨得咁。
至於即將上場嘅CY太太梁唐青儀就着得較隆重，以一件黑色長衫加條白色披肩。