沙螺洞係八仙嶺嘅心臟地帶，生態價值僅次米埔，林超英同多個環保團體因為擔心龕位工程會破壞當地生態，一早就建議環境局以等價「地換地」嘅方法處理，可以將沙螺洞納入八仙嶺郊野公園，不過結果係點，相信大家都估到，咪就係環境局無理佢哋建議囉，仲快刀斬亂麻趕住開會審議添。
不過林超英話，其實做保育工作偶然都有啲正面嘅成績嘅，就好似規劃署最近就從善如流吸納咗保育塱原自然風貌嘅意見，宣布修訂粉嶺古洞北嘅發展藍圖，絕對值得畀「十個讚」。
感嘆對保育無動於衷
最無奈嘅係，真正要做環保工作嘅環境局嗰頭就打着「自然保育」旗號破壞自然，林超英講到呢度只好感嘆，世上仍然有人對自然保育無動於衷。