中環出更：領養退休警犬 梁青華樂此不疲
喜運佳鐘錶常務董事梁青華一家最近領養咗隻九歲退休女警犬Connie。呢隻當差時負責搜緝爆炸品嘅拉布拉多犬，聰穎活潑，帶來趣事一籮籮，有時仲會職業病發作添。
職業病周圍搵爆炸品
年初華哥一家搬入大埔樟樹灘三層高嘅村屋，諗住養隻大狗看門口，於是同警隊提出領養退役警犬申請。領養人冇得揀狗，全由警方決定，事前仲要登門視察家居環境，過程好嚴謹。華哥話，家訪人員一見到咁大間村屋，不知幾滿意，而且梁家已有隻七歲狗女Kiki，符合有經驗及愛心嘅加分標準，所以好快獲批准。
當慣差嘅Connie初時嚟到好唔開心，試過離家出走。華哥有次帶佢去沙田彭福公園玩波，Connie冷不防跳入大水池去執波，嚇到華哥及太太不知所措，後來至知玩波及游水係佢最愛嘅活動。
有時Connie出街又經常周圍捐，好似有些少職業病咁搜索爆炸品。為咗照顧兩隻愛犬，華嫂忙到冇時停，人都fit晒。