香港地方細細，但名堂多多，既係國際都會，亦係旅遊之都，仲係航空樞紐，真係唔打得都嚇得。唔係純屬吹水o架，嗱，訪港旅客人數幾乎年年創新高嘅同時，港人對於出外旅行更加係趨之若鶩，造就咗香港國際機場成為全球最繁忙嘅機場之一，證明旅遊之都及航空樞紐並非浪得虛名。不過咁，港人喜歡出外旅行本來係賞心樂事，但如果遇着一間延誤頻頻、事故不絕嘅航空公司，咁就唔止大煞風景，仲隨時谷到一肚氣添！
講緊嘅咪就係香港航空及其姊妹公司香港快運囉。該公司近年頻頻傳出不利消息，淨係過去兩日，最少有十六班機大延誤。其中由香港飛往北京及日本沖繩嘅班機，分別延誤十三及廿三小時，部分乘客不滿航空公司安排失當而鼓譟，廿幾名原本飛沖繩嘅乘客甚至取消行程拒絕登機，有名乘客喺機艙等候期間心臟病發，好彩治療後無大礙，否則唔知點收科。航空公司解釋話，兩班機延誤係分別受到機件故障及天氣影響喎。
即係咁，如果真係因為機件故障及天氣影響而延誤，咁都無可厚非嘅。問題係，港航頻頻出事，延誤幾乎已成家常便飯，顯然唔係純粹機件故障及天氣影響咁簡單。早前甚至被指拖欠維修費及清潔費，搞到航空公司一度要自行負責維修，空姐仲要洗埋廁所添。仲有吖，港航被傳拖欠機管局泊位費，飛機被迫泊到偏遠嘅停機位，令延誤情況更加嚴重。
雖然港航否認拖數，聲稱因為核數需時先至遲咗付款，但無論點都好，咁嘅服務水平同趕客冇乜分別，乘客見過鬼怕黑，對該公司嘅信心仲唔大打折扣咩。講真吖，航空公司內部究竟發生乜嘢事，財政狀況如何，外界無從得知，但航班接二連三嚴重延誤就係人都見，咁唔止令乘客冇信心，直情令香港國際形象受損添吖。
話時話，航空公司必須獲得民航處發出營運許可證，至可以喺本港營運，航空公司經常出事，導致糾紛不斷，照計民航處應該主動監管及調查先至係o架。奇就奇在當記者向當局查問時，民航處居然話航空公司嘅服務表現唔係佢哋嘅監察範圍喎。
咁即係點吖？唔通由得航空公司出事都唔理？咪話功夫茶唔提醒，航班延誤事小，飛行安全事大，萬一唔好彩爆大鑊，港府都走唔甩嘅咋。當年甘泉航空突然清盤，受影響乘客數以萬計，引起一片混亂，結果要由其他航空公司接收，事件先至平息。呢啲亂象可一不可再，唔該民航處唔好再懶懶閒，主動了解吓港航究竟發生咗乜嘢事啦！