政情:Ann蔣回憶「劏房」辛酸史

立法會選戰升溫,盛傳積極考慮空降九龍西出選嘅民建聯副主席蔣麗芸(Ann),近排頻頻落區宣傳,佢尋日同傳媒聚會,大爆細個分別喺紅磡同美孚居住過,力證自己係「九西人」。

Ann姐仲自爆喺紅磡居住嘅時候,一家九口住喺六百呎嘅唐樓「劏房」,所以深明基層市民嘅需要喎。

貴為工業家蔣震嘅千金,Ann姐生活並非一開始就做上等人。佢憶述,小時候喺紅磡居住時,蔣媽媽就用木板間成自家「劏房」,Ann姐分到一間,但要同細妹分上下格床瞓。

後來蔣家搬去美孚,但係單位無乜大到,所以要繼續住特色「劏房」。難怪佢話:「我並非千金小姐,讀五年級時已幫手買餸煮飯。」

住咗九龍西咁耐,街坊多到電話簿咁厚,前日喺美孚落區,就有位中年男士上前「搭訕」,問Ann姐認唔認得佢。原來對方係青梅竹馬長大嘅舊街坊陳先生,咁都撞番,認真有緣。正因為呢份九西情,Ann姐話好想服務街坊,希望關注區內嘅經濟發展及婦女問題喎。

第一手消息請下載on.cc東方互動iPhone/iPad/Android/Windows Phone Apps

搵樓18即睇最新樓價走勢、最全面地產新聞及筍盤情報