政情：「夏鄭汝樺」丈夫不姓夏
運輸及房屋局局長鄭汝樺（Eva）好少提及屋企人，外界連佢老公姓甚名誰都唔知。尋日Eva同傳媒臨別聚會，展示咗幾幅結婚相及一家四口嘅溫馨家庭照，但佢就始終唔肯講老公姓甚名誰，有記者見到佢寫嘅「雲在青天水在瓶」墨寶署名上面有個「夏」字，仲以為佢係夏太，點知原來係壬辰年夏天咁解，搞到大家得啖笑。
睇相先知Eva細個時係長腿少女，而佢老公就高大英俊、官仔骨骨，有幾分似前麗的演員林國雄；而佢個大女更係美女一名，細女就十分可愛，總之幸福滿瀉，但佢就唔肯畀記者影相刊登。至於離任後做乜，Eva話會去玩番夠本，三個月去四個旅程，之後就再諗吓做啲非牟利慈善工作，但絕對唔會幫私人機構打工。
離任在即，Eva話對新政府無限支持，仲叫市民畀機會新特首梁振英實踐承諾。問佢點睇張炳良擔任房屋局局長，Eva就大讚張炳良係謙謙君子，叫大家對佢好啲。另外，佢話港鐵可加可減機制正檢討緊，考慮引入新計算元素，如果將來港鐵服務表現差，可扣減其加幅或為加幅封頂喎。