貪曾早前以處理新舊政府無縫交接為由，取消到日本訪問，但尋日政界傳來消息，話佢下周三會飛上北京，乜佢唔係話咗餘下任期都唔會再嘥公帑外訪嘅咩？唔通係北京當局等唔切廉政公署嘅調查結束，連一個星期都忍唔到，急召佢「赴京」請罪當面免佢職？
不過，事實可能會令大家失望喇，據聞貪曾今次上京，只係應邀出席一個「香港周」嘅活動，但估計到時佢無論見到任何京官都好，都會由頭震到落腳，唔知對方會講乜嘢說話奚落佢。
據悉候任特首梁振英（CY）亦有獲邀出席有關活動，但仲未決定去唔去，即使去都只會即日來回，以便盡快返港處理交接工作。記得CY曾經講過，佢去短途旅程只會坐商務客位甚至經濟客位，如果貪曾同佢同機，又堅持貪到最後一分鐘坐頭等機位，大家一對比，你都咪話唔醜！