食豉油，邊隻好？各位唔好誤會，功夫茶唔係唱緊廣告歌，更加唔係做咗豉油代言人，而係要提醒大家，食豉油唔理邊隻好，最緊要揀一隻全無含毒工業鹽水！
中國人相信係全世界最鍾意自相殘殺嘅民族，為咗大發不義之財，居然可以「相濡以毒」。中國製造嘅黑心食品排山倒海而來，繼聞風喪膽坑渠油之後，今次輪到有機會一食即死嘅毒豉油，毒性媲美江湖盛傳嘅「七步冚包散」或者「含笑半步釘」。你知啦，豉油呢家嘢係中國人餐桌必備嘅調味料，無良奸商利用致癌工業鹽水魚目混珠，大量炮製令人防不勝防嘅毒豉油，食唔死算你祖宗有靈保你闔府平安。
廣東省有一間馳名豉油生產商威極公司，最近被揭發涉嫌購買七百六十噸工業鹽水製作過千噸毒豉油，貪佢成本便宜一半，暴利賺得更多。已知近二百噸半製成品賣咗畀珠三角好多調味品企業，加工後再賣畀全國各地食品同餐飲企業。簡單咁講，含有致癌物質嘅毒豉油傾銷全國無孔不入，話唔定已經入侵香港！
如果你以為中國奸商梗係道德淪喪嘅內地同胞，咁你錯嘞。操控威極公司嘅幕後老闆係一個姓關嘅香港男子，內地警方發出緊急追捕令。功夫茶求神拜佛，天涯海角都要將呢一個港人敗類緝捕歸案。
工業鹽水主要用於皮革同紡織等等化工企業，功能係處理污水，中國政府明令禁止作為食品添加劑。香港醫生勞永樂就話嘞，工業鹽水含有較多重金屬以及致病細菌，對人體有極大傷害，嚴重者可以立即致死。內地醫學專家亦指出，長期食用工業鹽水危害肝腎器官，甚至導致胎兒畸形並且致癌。
既然有機會立即致死，奸商係咪冷血到毫無人性吖？如果幕後老闆被繩之以法，功夫茶建議除咗依法懲處之外，最好餵佢飲晒自己生產嘅毒豉油，等你禍國殃民吖嗱！
講到呢度，有必要將矛頭轉一轉向，請問中國黑心食品氾濫成災嘅罪魁禍首到底係邊個？第一個當然係奸商啦，第二個無疑係貪官，假如冇官商勾結，打死都唔信假劣山寨貨可以多得咁交關囉。官商一旦勾結成風，把關巡查必然寬鬆到冇朋友，久而久之病從口入嘅中華兒女又會變番東亞病夫。
即係咁，杜絕黑心食品必須從反貪腐開始，官僚懶於把關的話，人人中毒，個個死實。
嗱，香港嘅食物安全管理都唔可以鬆懈o架，反正尸位素餐嘅食衞局局長周一嶽冇得留任，新局長一於撥亂反正重振雄風，唔好容許毒豉油之類嘅黑心食品橫行無忌！