逆水行舟，不進則退。香港自詡旅遊之都，點知老貓燒鬚，喺最新公布嘅全球最佳旅遊城市排名中下跌一級，只得第六；而旅客消費方面，香港排名亦跌至全球第十五位，唔止旅遊之都岌岌可危，連購物天堂都搖搖欲墜。
根據信用卡公司公布嘅全球最佳旅遊城市調查，倫敦、巴黎、曼谷、新加坡繼續蟬聯頭四位，而去年排名第五嘅香港，就畀土耳其嘅伊斯坦布爾從後趕上，跌出五大。大家咪以為香港排名只係下跌一級，濕濕碎啫，須知旅遊業係香港重要經濟支柱，好多人靠佢食飯o架，排名繼續跌落去，都咪話唔擔心吖。
排名下跌都仲係其次，更令人擔心嘅係訪港旅客似乎唔多願意消費，搞到香港購物天堂嘅招牌搖搖欲墜。嗱，旅發局日前指出，今年首季訪港旅客人均消費出現放緩迹象，只係比去年輕微上升百分之一，增幅同訪港旅客人數升幅完全不成比例。究竟乜嘢原因令旅客唔肯消費？旅發局話喎，歐美經濟疲弱，加上本港酒店不足，房租好似海鮮價咁，旅客咪惟有減少消費囉。
正所謂，居安思危。香港旅遊業表面上一片興旺，實際上問題多多，危機四伏，唔止受歡迎程度今非昔比，連旅客消費都明顯放緩，遲早無以為繼嘅咋。鬼咩，香港酒店租金貴到離譜，尤其係旺季，房租閒閒哋比平時貴成倍，連普通賓館都要過千蚊一晚，仲係一房難求，有乜法子唔趕客。反觀同屬亞洲城市嘅曼谷同新加坡，真正做到價廉物美，賓至如歸，排名高於香港絕對合理。
講起香港酒店不足，其實已經係老問題，港府唔係闊佬懶理，就係敷衍了事。就以活化工廈嚟講，如果搞得好，可以將唔少工廈轉為賓館，大大紓緩酒店不足嘅問題，可惜當局講就天下無敵，做就無心無力，結果工廈搞嚟搞去始終唔化。唉，曾蔭權上台七年，胡混度日，自己就周遊列國，豪住總統套房，點會關心香港酒店不足呢啲問題吖。
仲有吖，香港話就話係購物天堂，但黑店宰客、強迫購物嘅醜聞不絕於耳，搞到臭名遠播。而更不堪嘅係，香港旅遊景點年年如是，來來去去不外乎兩個主題公園、維港夜景、太平山頂，另加一個故障頻頻嘅昂坪纜車，完全冇新鮮感，點樣吸引旅客喎。冇法子喇，港府不思進取，得過且過，唔係食老本，就係寄望阿爺打救，長此下去，香港喺全球旅遊城市排名分分鐘跌出十大都似！