政情:CY太太應徵做梁太

下屆政府副局長招聘工作尋日喺候任特首辦正式開始,疑似應徵者無不被傳媒重重包圍追訪,遴選委員會成員之一高靜芝就話,其實由步入候任辦都係考驗之一,因為做副局長都要識面對傳媒鏡頭喎。不過,尋日首批面試嘅七位應徵者都相當怕醜,由始至終都無直認嚟應徵,唯獨第八個「應徵者」最坦白。

其實第八個「應徵者」,就係候任特首夫人梁振英(CY)太太唐青儀喇!話說梁太尋日離開候任辦時,見到咁多傳媒守候仍處變不驚,仲風趣幽默咁同傳媒講:「我嚟應徵做梁太!」梁太應徵做梁太?唔通原先個梁太辭咗職?抑或特首夫人人選尚未選定呢?梁太就笑笑口話,自己都係講吓笑啫!唔知梁太呢個應對,CY會打幾多分呢?

第一手消息請下載on.cc東方互動iPhone/iPad/Android/Windows Phone Apps

搵樓18即睇最新樓價走勢、最全面地產新聞及筍盤情報