政情：白鴿作反想做官？
負責遴選下屆政府副局長同政治助理嘅委員會，收到好多建制派政黨推薦嘅人選，單係諗點派餅仔已經好頭痛，但據聞除咗建制派有意薦人加入政府外，民主黨都有黨員想試試做官滋味。消息指民主黨最少有四人申請做副局長同政助，呢四人中有老鴿又有乳鴿，如果候任特首梁振英真係揀中佢哋，就真係算「大和解」嘞，唔知CY點諗呢？
當初唐英年選特首，大家都估白鴿黨有機會加入管治核心，但當時主席鐵頭仁已信誓旦旦講過，一日未有全面普選，民主黨都唔使旨意加入管治團隊。但近日有消息傳出，民主黨最少有四人申請做副局同政助，部分人更係夾埋一齊寄信，似係有組織。
馮煒光無肯定亦無否認
我哋問咗好多白鴿黨友都話無申請，直到問到南區區議員馮煒光，開始有啲端倪嘞。呢位講明想選超級議席，但最終缺乏黨內支持而放棄競逐嘅白鴿中人，一聽到我哋問佢係咪申請咗做副局同政助，佢即刻話忙緊公事，然後收咗線。之後我哋用手機短訊直接問佢「有申請定無申請」，馮煒光就回覆話「唔好亂寫，黨內會好煩」，之後仲引用已故女星阮玲玉名言「人言可畏」嚟做結尾。做開公關工作嘅佢，以一個既無肯定，亦無否認嘅答案回覆，真相係點大家心中有數。
點解班黨友會咁大膽違反黨規？據了解，原來班乳鴿唔係諗住飛黃騰達，而係諗住「衝關」，寫住民主黨牌頭，睇吓CY會有乜反應。不過馮煒光咁驚人言可畏，可能唔係基於同一原因申請喎。
有人靜雞雞申請唔想畀人知，但亦有人好想揚畀人知。講緊咪係班建制派囉，尋日立法會人事編制委員會討論緊五司十四局，臨尾班建制派就猛咁舉手申報利益，新民黨葉劉話有推薦黨員做副局、政助，工程界何鍾泰又話曾經幫人寫過推薦信，連民建聯劉江華都話有薦人，但無喇喇強調民建聯無抽佣，只係做介紹人。明明係要直接金錢利益先要申報，但佢哋咁想畀人知，似係博宣傳多過申報囉。