政情：電車公司換港人掌舵
法資公司○九年入主香港電車公司，搵咗個法國人Bruno Charrade做第一代電車掌舵人，但我哋收到風，Bruno將會被調去智利。掌舵人之位就由現時電車公司第二把交椅、曾經喺運輸署做過十六年嘅曾永鏗頂上，下月一日履新，意味電車會交番畀同聲同氣嘅中國人管理。
曾永鏗擁有豐富管理交通運輸經驗，八十年代加入運輸署，一度擢升至總運輸主任，到九十年代「棄政從商」搵真銀，轉做新巴，佢話自己係新巴第一個聘請嘅員工，主要負責投標工作。期間佢又喺港大兼職教書，教交通運輸範疇，直至去年加入電車公司，現時為副董事總經理。
問到有乜發展大計，曾永鏗話正着手研究點樣改善中西區交通擠塞問題，令電車可以提速；又希望政府可以將長者及殘疾人士兩元搭車優惠擴展至電車，又透露電車母公司有興趣喺啟德、西九引入運輸系統服務，總之大計一籮籮。唔知做過官嘅佢，同政府磋商時會否有更大嘅議價能力呢？