政情：黑英沖涼 唔用沐浴露
前天文台台長林超英（黑英）退咗休已有三年幾，但係佢對保護環境嘅熱誠就似乎連十號風球都吹唔走！香港地球之友尋日喺西九龍中心搞咗個節能活動，黑英梗係有份出席啦，事關佢同老婆居住千呎大屋，但每日平均只用兩度電，一個月都唔使一百蚊電費，近年政府提供嘅電費津貼到依家都未扣完，簡直係實踐綠色生活嘅佼佼者！
活動仲播咗一段短片，由黑英喺屋企示範點樣減低家用電器嘅用電量，佢最精警嗰句就係「唔好畀啲電走入去電器就可以慳到電」，搞笑得嚟都幾有道理。黑英又話，佢老婆讀過中醫課程，知道成日吹冷氣會傷身，佢哋於是由去年開始就靠開窗嘅對流風都可以舒服瞓覺。
唔講唔知，原來黑英連沖涼都環保過人，只用清水沖身而唔落沐浴露，佢話身體自然分泌嘅油仲滋潤喎！
其實黑英以前喺辦公室唔過三十度都唔開冷氣，只會開窗抖涼，但唔係每個入佢房開會嘅同事都頂得順，佢覺得自己細個都唔使靠冷氣，所以叫依家啲後生仔不如出下汗排毒仲健康喎。