政情:袁彌明幫劉嗡轉「型」

立法會議席出缺安排嘅「拉布」戰已落幕,人民力量同社民連係時候要積極準備九月立法會選舉。將會出戰嘅人民力量劉嘉鴻(劉嗡)就由形象革新開始,仲有最識扮靚嘅前港姐袁彌明(Erica)教路添。而社民連亦都為選舉急聘大量「臨記」,但呢份工係無糧出嘅,仲要畀阿伯鬧、畀阿婆藐,擺明寸爆被指畀錢請「臨記」示威嘅民建聯。

劉嗡為選舉決定執吓個形象,日前就喺Erica陪同下去咗配副新眼鏡,Erica仲用手機幫佢影低個look擺上社交網站facebook,有網友叫Erica幫劉嗡執盡啲,仲話要佢改埋啲小動作喎。

社民連請無糧「臨記」

社民連亦積極備選,副主席吳文遠就出咗張海報招請「臨記」,起初以為佢哋只係玩嘢,但原來係想搵義工。吳文遠話,做呢份工最緊要係心中有火,仲要預咗「畀阿伯鬧、畀阿婆藐、畀民建X圍」,佢仲試過畀人掟雪糕咁話。不過,佢哋請「臨記」係無糧出嘅,咁辛苦嘅工仲話要大量請人,睇嚟唔係咁易。

第一手消息請下載on.cc東方互動iPhone/iPad/Android/Windows Phone Apps

搵樓18即睇最新樓價走勢、最全面地產新聞及筍盤情報