政情：熱血90後爭取學生談判權
唔好話年輕人無遠大嘅理想，有十五個志同道合嘅九十後就組織咗一個叫做香港中學生聯合委員會嘅團體，佢哋嘅志向，係喺五年內成立一個香港學生會，核心成員要喺全港中學生普選出嚟，話咁先夠代表性，日後可以同政府「談判」咁話。
普選學生會嘅概念來自係十九歲嘅林曦（Alfred），佢係赤柱聖士提反書院嘅「末代高考生」，半年前考生最忙碌嘅時候，佢情願放低書本，仲捐埋成副身家做起動資金，目的都係想幫學生發聲。佢話香港依家就係缺乏一個具代表性嘅學生組織同政府「談判」，所以咁多教育政策都無諮詢學生意見。未來佢哋會舉辦多個公眾論壇同埋大型比賽，又會以社交網站facebook同一班九十後聯絡，希望多啲學生識佢哋。
另一個成員陳俊塱（Heywood），本身都係熱血社運青年，佢話自從○三年同父母上街之後，明白政府施政真係好混亂，作為九十後都要爭取發聲，唔好做橡皮圖章。