政情:幹部「FV」車驚現EQ地盤

立法會選舉新界東名單花多眼亂,盛傳獲西環力撐專業形象色彩濃厚嘅沙田區議員葛珮帆(EQ),一舉一動都備受關注。尋日網上瘋傳一輛代表「內地幹部」嘅「FV」車牌房車,疑似駛入咗EQ所屬嘅馬鞍山頌安選區,有人即時聯想同選舉有關。不過,EQ就斬釘截鐵話無聽過呢個傳聞,又相信呢排都會有好多謠言同抹黑喎。

根據網民上載嘅相片嚟睇,呢輛代表「內地幹部」嘅「FV」車牌房車,係直接駛入屋邨嘅花園行人專區停泊,有人估計輛車係由消防通道進入嘅,即係得到房屋署批准,究竟做乜真係唔知道,於是有人估計係咪同EQ參選立法會選舉有關,莫非想喺選舉前「抹紅」EQ?

我哋就此問過EQ,佢話無聽過亦無人同佢提過呢個傳聞,又笑言如果有啲咁得意嘅嘢應該有人同佢講喎。話時話,選舉前總係謠言滿天飛,分分鐘影響選情,真係要識得拆彈先至得。

第一手消息請下載on.cc東方互動iPhone/iPad/Android/Windows Phone Apps

搵樓18即睇最新樓價走勢、最全面地產新聞及筍盤情報