中環出更：梁慶儀接掌崇德社 重平等
匯聚婦女精英嘅香港崇德社前晚舉行兩年一度嘅換屆儀式，新知舊雨濟濟一堂，梁慶儀將接替霍關天穎（Bonnie）擔任新主席。梁慶儀本身對教育好有興趣，佢話任內將會着重年輕人教育，以及宣揚男女平等訊息。
歷屆主席作風迥異
至於剛卸任嘅Bonnie，任內出色嘅表現受到會員讚揚，作為畫家嘅佢以藝術家風格帶領香港崇德社度過兩年繽紛歲月。
本身係港大博物館主席嘅Bonnie係一名畫家，佢過去以藝術角度來處理會務，例如向來以黑白印刷嘅香港崇德社雙年刊，今年要講求精美改以彩色印製。
創會會員只剩三人
Bonnie話，多年來香港崇德社嘅主席因為背景關係，都有着唔同嘅風格，好似前主席吳文華（Pauline）係立法會秘書長，於任內建立一套井然有序嘅文書記錄制度，令到該社獲益良多。
Pauline話，香港崇德社多姿多彩嘅會務同活動令佢有機會接觸其他層面嘅人士，擴闊視野，為佢沉悶嘅議會工作帶來調劑。而創會會員華慧娜就話，香港崇德社成立之初有會員十七人，四十年後創會會員只剩三位，原來其中一人就係自由黨副主席周梁淑怡。
雖然崇德社嘅會員大多數係女強人，但係會員之間嘅相處真係好融洽，呢種情同姊妹嘅友誼確係咁多年來都無改變。
卓妮