政情：立會玩拉布弄假成真
立法會尋日繼續審議議席出缺安排修正案，正當人民力量立法會議員黃毓民同成班建制派議員喺會議廳內打緊拉布戰時，會議廳外一塊灰色防火幕就成塊跌咗落嚟，隔絕晒大玻璃外面嘅光線，搞到成個走廊變得黑沉沉。有議員笑住話今次係假拉布變成真拉布，又話工聯會議員王國興可以充分利用咁大塊布寫大字。立法會主席曾鈺成仲話今次連佢都無能力「剪布」喎。
豆腐渣防火幕脫落
尋日凌晨五點，一塊喺會議廳旁，闊十九米、高七點幾米嘅防火幕突然之間跌咗落嚟，建築署已經安排喺尋晚休會之後進行緊急維修。唔少出席會議嘅議員奇怪點解有塊灰幕籠罩成條走廊，工聯會葉偉明知道防火幕故障後就指住塊布大笑，仲話「呢啲好明顯係豆腐渣工程啦！」
曾鈺成夜晚出去食飯時順道視察防火幕嘅破壞程度，有記者叫主席快啲幫手「剪布」，曾鈺成就笑笑口咁話：「咁大張布好難剪o架喎。」