一班副局長及政治助理向來被批評無表現，趁住政府換屆在即，政府日前宣布下屆政治助理將會大幅減薪外，盛傳有幾位政助亦無得留任下屆政府。唔知係咪咁，政制及內地事務局就特意安排幾位政助到立法會同記者講感受，幫佢哋鋪砌離任下台階。當然佢哋唔會話自己無得撈啦，只係暗示唔想撈啫，跌落地拿番揸沙。
食物及衞生局政助陳智遠（Paul）、民政事務局政助徐英偉（Caspar）及教育局政助楊哲安（Jeremy）尋日喺立法會逐一表明心迹，話未必會留任下屆政府。Paul同Caspar兩人都話未諗過去留問題，而阿Paul就話好難評價自己呢幾年嘅工作表現，又略為感嘆話政助多數會從事幕後工作，公眾未必會睇到佢哋一舉一動喎。
Jeremy亦承認留低嘅機會唔大，又話做咗教育局差唔多四年，期間無政策由佢專門負責，搞到佢覺得發揮空間唔大。Jeremy又話，唔排除會重返自由黨做幕後軍師，但卸任後要同太太張燊悅及兩個囡囡去旅行叉電喎。