政情：工聯新星接棒做議員
工聯會喺嚟緊立法會選舉，務求要喺超級區議會同全港五大區直選都要搶到議席，正當大家將注意力集中喺直選嘅時候，該會手上兩個勞工界議席嘅人選亦已敲定，分別係離島區議員鄧家彪及東區區議員郭偉強，兩人都係四十歲未到嘅專業社工，啱晒工聯會年輕化路線。
工聯會內部規定，勞工界議席只可以做一屆，如果有興趣繼續做立法會議員，就唔該表現好啲，憑實力轉戰直選。就係因為咁，工聯會每屆都至少培養到兩位年輕新面孔，今次呢兩位新星賣點除咗年輕同專業之外，兩位都分別參加過兩屆區議會選舉，相信將來轉戰直選都無難度。
先講鄧家彪，以前曾經幫過工聯會榮譽會長「票后」陳婉嫻搞選舉，○七年被安排去東涌做開荒牛，順利當選，由於有實績，去年順利連任。至於郭偉強情況差唔多，以往做過工聯會立法會議員王國興嘅助理，同樣○七年首度參加區議會選舉勝出，去年連任。兩位都係紅褲子出身，如果未來四年做得好好睇睇，肯定係工聯會嘅明日之星。