政情：馬頭圍冧樓 林鄭最「傷」
好大機會擔任下屆政務司司長嘅發展局局長林鄭月娥，尋日上電台回顧任內工作。外號「好打得」嘅佢並無hea住等收工，實牙實齒話會搞掂被形容為「燙手山芋」嘅河東花園及舊政府總部西翼保育工作，話唔想留番啲手尾畀下屆局長喎。
母親正值彌留狀態
林鄭又力撐新政府改組，聲言無特定方程式係最好嘅，仲對將來嘅文化局有信心，可以結合文化、文物，將保育工作推上更高台階。
講到任內令林鄭最感觸嘅事，就係前年馬頭圍道塌樓慘劇，佢話當日視察現場好傷感，因為死傷者都住喺劏房，正係社會上最要幫嘅人。林鄭話，當時喺立法會辯論時一度感觸，有傳媒形容佢「淚盈於睫」，原來當時佢媽媽處於彌留狀態，並喺幾個星期後離世，佢尋日一路講一路聲沙沙幾乎想喊，惟有抬頭強忍眼淚。