政情：高官凍薪建制派爭邀功
建制派喺九月立法會選舉係生係死，除咗睇佢哋有無自作孽外，候任特首梁振英（CY）嘅新政府政績都可以幫到佢哋。建制派深明此道理，無不想將CY民望推高，日前佢哋就做咗場大龍鳳，要求下屆政府問責團隊凍薪，而CY聽取意見後亦話積極考慮。有傳呢場大龍鳳係民建聯主席譚耀宗（譚Sir）度出嚟，但唔少建制派都爭住認叻，猛話自己成功爭取下屆問責團隊凍薪。
相信唔會有市民反對「高官凍薪」呢個建議，但究竟係邊個議員咁醒，諗到呢條橋呢？尋日第一個彈出嚟「成功爭取」嘅係專業會議梁美芬，佢自稱喺飯局上第一個提出呢個建議，估唔到咁多人都同意喎。自由黨劉健儀亦爭住認叻，話自己前日已經喺委員會上講過凍薪問題。另外，工聯會王國興亦話一早聽到民意話要官員凍薪，而新民黨葉劉淑儀亦話有提出過有關建議。
商討後至出招 一石二鳥
不過，有知情人士話，其實呢條橋嘅始作俑者可能係民建聯，事關該黨上周二嘅中委會討論高官凍薪嘅建議，之後譚Sir就被記者影到佢單拖行入候任特首辦，再之後就發生建制派飯局嘅高官凍薪大龍鳳喇。有建制派議員話，現時架構重組建議受到泛民主派議員阻撓，如果建制派率先出招建議高官凍薪，效果好似着咗件避彈衣咁，多個理由支持通過架構重組建議，事關高官凍薪一定令市民受落。
其實建制派同政府商討後至出招，以往唔係未試過，例如向全民派錢六千元就係咁，但當時係畀市民鬧爆後先肯做嘢，而唔係主動出擊。所以今次建制派趁市民未有太大反對聲音就做定預防措施，講明好可能會將下屆問責團隊凍薪，拆定呢個未來大炸彈，一來可以畀建制派攞彩，二來可以禁止泛民增加政治本錢，絕對係一石二鳥。