中環出更：青聯招聘日 筍工月薪五萬
香港青年聯會第四屆招「工」日將於下月九日舉行，配合今年聯會成立二十周年，活動將比往年更盛大，超過二百五十間企業公司，提供逾三千個職位畀大學及大專生即場面試。據聞今屆最「筍」工作係財務分析員，月薪達五萬元，全場職位平均月薪都有三萬五千元，仲加入大量政府職位空缺，相信會吸引唔少大學生應徵。
香港青聯主席葉振都、活動籌委會副主席楊鼎立（Derek）、郭永亮（Andy）、鄭詩韻（Michelle）等核心成員，齊齊瞓身宣傳活動。講起搵工辛酸史，Michelle話九七年留學畢業返港，不幸遇上金融海嘯，最終只任職月薪一萬元嘅分析員，每周工作一百小時，做到無晒人生樂趣，後來自行成立公關公司，先至找回自我。
面試忌印印腳冇腰骨
本身做資訊科技行業嘅Derek話，今年公關同科技界求才若渴，建議大家多考慮。講到見工秘笈，佢哋都異口同聲話，見工時千祈唔好「印印腳」或者冇腰骨，切記要同僱主保持眼神交流，表現出對工作嘅「一團火」。面試經驗豐富嘅Andy話，試過有青年見工，態度冷淡之餘，連佢公司做乜都唔知，真係激到紮紮跳。