中環出更：陳振聰偕妻女High Tea懶理途人指點
捲入已故華懋集團主席龔如心爭產官司嘅商人陳振聰，雖然喺官司中節節敗退，仲要變賣資產應付巨額訴訟費用，但無損佢嘅心情。尋日下午約三點鐘，陳振聰同太太譚妙清、私生女倫培珍（Polly）及細佬陳振國等一行五人，齊齊現身中環置地廣場嘅星級法國餐廳，期間眾人談笑風生，歎足三小時至拉隊離去。
陳振聰等人現身後，柯打咗成枱下午茶美食，睇嚟胃口唔錯。期間三個大男人有講有笑，Polly亦不時加入話題，氣氛輕鬆。不過，陳太就比較悶，經常一個人玩手機。佢哋坐喺人來人往嘅路邊位，期間唔少途人認出陳振聰，仲不時指指點點，但佢哋並無理會，直至大約六點十五分先至拉隊離去。
聞龔母或獲分遺產愕然
卓妮上前打招呼，陳振聰笑笑口話，今次無乜特別嘢傾，一般飲茶啫！問佢律政司代表律師提出，龔如心嘅高齡母親可能係遺產受益人之一，佢聽完有少少愕然，話無睇到。至於外間盛傳佢變賣資產套現應付官司，佢只係不停講「多謝關心」，然後同妻女一齊登上座駕離去。
不過，卓妮發現接載佢哋座駕係登記喺某間車行名下嘅日產LEAF電動車，早前都仲見佢坐開一架掛有中港牌嘅豪華七人車，唔知去咗邊呢？唔通變賣咗？
卓妮