候任特首梁振英（CY）自從當選之後，暫時只係搵咗三個「近身」入候任辦公室，反而一直幫佢應付傳媒嘅私人助理鄭希暄（Scott）則未喺名單之內，有人就即時懷疑CY對Scott係咪「用完即棄」，但其實一切都只係美麗嘅誤會，Scott其實另有高就開咗間公關公司，而且仲「升呢」評論時事添！
一直同CY緊密合作多年嘅Scott，自特首選舉後疑似銷聲匿迹，查實Scott收埋自己係另有大計，據聞佢最近開咗間公關公司主力做策略公關，無論政治同企業公關項目都無任歡迎，之後又會喺報紙寫吓文章月旦時事，最近仲有人見佢以時事評論員嘅身份上咗路訊通嘅節目，幫CY手推銷新政府嘅架構添。
Scott接受我哋查詢時小心翼翼，多番強調佢嘅言論並非代表CY。
有人睇過有關節目後講笑話，Scott認識新架構概念嘅程度，拍得住候任特首辦主管羅范椒芬，難怪可以跟咗CY咁多年喎！