政情：梁振英回請飯局拒飲酒
特首選舉後「大和解」之風傳遍政圈，候任特首梁振英（CY）尋日回請建制派，飯局難免有觥籌交錯嘅場面，但CY出名小心謹慎，令專程帶咗茅台想同CY飲嘅中總代表黃宜弘慘食檸檬，最後埋單計算係一萬一千多元，平均一人都唔使四百蚊，貫徹CY不豪食豪飲嘅作風。
CY上月訪京後隨即出席建制派喺中總舉行嘅「大和解」飯局，但多名支持唐英年嘅議員缺席飯局，惹來「深唐」中人堅拒「大和解」嘅揣測，事隔一個多月後，CY喺候任辦主管羅范椒芬陪同下回請建制派，合共有廿七名議員出席，包括上次無現身嘅唐唐「家臣」林大輝同自由黨主席劉健儀，自稱同CY廿年老友嘅黃宜弘仲帶埋茅台赴會，諗住盡興。
CY夠小心唔飲酒，但就帶咗五支紅酒請議員飲，當佢見到劉健儀酒杯中無酒，仲主動趨前斟酒。CY又親切稱呼身旁嘅民建聯主席譚耀宗為「耀宗」。「耀宗」則喺席上疑似意有所指，寄語CY要廉潔奉公，未知係咪有意寸爆「貪曾」曾蔭權？