政情：新東三女 奇招冧選民
正所謂「三個女人一個墟」，立法會新界東三名建制派疑似女候選人票源相近，惟有各出奇謀冧選民，已「嫁入」公民力量嘅龐愛蘭（Scarlett）即將推出手機程式（App），等市民可以行到邊投訴到邊；民建聯嘅葛珮帆（EQ）關顧女士人身安全，邀請拳王教授「防狼五招」；至於前自由黨成員方國珊（Christine）則不時向選民發出短訊（SMS）作溫馨提示，選舉令人放下身段果然係至理名言。
全方位發功 誓留好印象
立法會新界東今年由七席增加至九席，各個政黨政團都密謀派人搶灘，為咗脫穎而出令市民留下印象，有部分疑似女候選人噓寒問暖嘅力度，某程度同大家嘅親生媽媽都有得揮。
一向形象入屋嘅Scarlett，近日將宣傳策略「升呢」至高科技，佢快將成功研發附有GPS定位嘅Android投訴App，等市民可以去到邊投訴到邊，為咗方便市民，Scarlett仲預先整咗個標準投訴信格式畀市民用，市民只要輸入投訴內容就得，唯一仲要研究嘅係封信用佢定市民名義發出，好明顯係慎防畀人惡搞。
主要以專業人士做賣點嘅EQ，環保保育成日掛喺口邊，佢嘅主打議題就係「急婦女所急」，所以近年不時以該黨婦女事務委員會主席身份搞活動，最令人留下深刻印象嘅係派發拳王教授「防狼五招」單張，未知係咪為咗加強說服力，EQ當時不惜親自上陣示範埋一份添！
至於本身冇政黨背景嘅Christine，以密食當三番嘅形式同市民接觸，當感冒流行季節就透過短訊轉載預防感冒食療方，冬天天氣寒冷又叫大家多添衣服保暖，連最近消防員要求縮減工時佢都唔放過，總之全方位發放消息唔怕畀人話佢滋擾。
其實講到尾三名疑似女候選人奇招百出，都係為搶票，究竟大家最buy邊個嗰套，九月選舉投票後自有分曉。