講緊係佢將於下月十五日出席立法會「最後午宴」，但六十個議員只得三十三人報名出席，泛民主派議員更係小貓六隻，臨走前都被人唾棄，好心佢檢討吓自己啦！
「最後午宴」冷清清
立法會議員每年都會同特首及行政會議成員食兩次飯，而下月搞嘅午宴就係煲呔曾出席嘅最後一次。不過，似乎無人畀面佢，就連經常同佢眉來眼去嘅民主黨，都只係有四人肯出席，其餘兩人就係梁家傑同工黨張國柱。
建制派方面亦無一個黨齊人，民建聯派咗九人去，其他黨就只係派代表出席就算數，唔去嘅就包括專業會議梁美芬、石禮謙及霍震霆，仲有曾經被指同煲呔曾把臂同遊日本嘅「曾朋友」、金融界議員李國寶都無報名參加，究竟係咁啱唔得閒吖，定係刻意要避嫌呢？