中環出更：張燊悅拖囡囡玩轉超市
前藝人張燊悅（Nicola）自從嫁畀前立法會議員楊孝華嘅公子、教育局政治助理楊哲安，誕下兩個可愛精靈嘅寶貝女之後，疊埋心水做全職家庭主婦，對於老公嘅政途，一於好少理。早幾日下晝五點鐘，卓妮喺中環ifc見到心情勁靚嘅Nicola，拖住大女Lucy同細女Lily四圍逛，期間佢好細心咁照顧愛女，盡顯賢妻良母形象。
購物車玩司機乘客遊戲
卓妮見化淡妝、頭上架黑超及踢拖嘅Nicola拖住兩個女同工人，現身中環ifc嘅citysuper購物，一行四人排成直線，引起唔少路人注目。
入到超市，Nicola手推購物車，兩個囡囡即表現得好興奮，一個坐上車做「乘客」，一個做「司機」推車，將超市變做遊樂場，真係精力旺盛，難得Nicola完全無責備，只係叫愛女注意安全。
大約十五分鐘後，Nicola同囡囡走到收銀處付款，隨手將貨品放入自備環保袋，隨即走過對面間意大利乳酪店「yo MAMA」買乳酪，媽咪無偏心，兩個囡囡一人一杯乳酪唔使爭。愛女食得好滋味，但Nicola自己就無食，只係忙於幫囡囡抹嘴，睇落都幾溫馨o架。
卓妮上前同Nicola打招呼，問吓佢老公過渡新政府有無着落，佢就微笑好客氣話：「今日享受家庭樂，其他嘢我唔會答架喇！」之後繼續帶住甜到漏嘅笑容同愛女離開，果然有女萬事足。
卓妮