政情：街工破解房委會的密碼
房屋委員會決定加租，雖然同時整色整水免租一個月，不過係人都知道，租金呢啲嘢加咗就冇回頭，所以唔少團體近日都紛紛走去房委會示威請願表達不滿，好似街工尋日就拉隊六十人一齊去示威，仲好有創意咁將房委會標誌改為金錢符號（圖），諷刺房委會見錢開眼。
街工服務對象一向都係基層為主，對公屋加租呢啲敏感議題當然會有反應啦，佢哋尋日六十人，包括多名公屋居民，去到房委會位於何文田嘅總部示威，一班示威者仲上演街頭劇，揶揄建制派立法會議員當年支持通過公屋租金「可加可減」機制。
標誌可砌成金錢符號
不過整個活動最爆嘅並唔係呢啲基本嘢，而係街工成員將房委會個標誌改為代表錢嘅符號，仲將呢啲改圖貼晒上房委會總部門外，將房委會個名稱全部遮住晒。據稱，咁係代表房委會見錢開眼，亦有房委會已經畀金錢蒙蔽嘅意味喎，唔知大家睇完又感唔感受到呢？