政情:張炳良捨教鞭入官場

新政府高官人選真命天子陸續曝光,盛傳出任下屆政府房屋及規劃地政局局長嘅張炳良,尋日終於宣布會喺六月底辭去香港教育學院校長一職,準備迎接新崗位。雖然張炳良對於「新崗位」隻字不提,但咁啱喺政府換屆前離任,加上做咗四年半教院校長嘅佢突然提早半年解約,就連教院正名大學嘅重要任務亦棄之不顧,大家都估到佢份新工係乜啦!

現年五十九歲嘅張炳良,曾經做過匯點(民主黨前身)主席、民主黨副主席及立法局議員,雖然佢有泛民主派背景,但自從○四年底退黨後,已蟬過別枝,又成立過政治組織「新力量網絡」,跟手仲入埋行政會議,成功洗底。從政多年嘅佢亦係城市大學研究公共行政嘅學者,○七年教院發生干預學術自由風波後獲薦做校長,主力爭取將教院正名為大學。

爭取教院正名過程中,張炳良今年初一句「指日可待」,確實為教院師生帶來希望,但如今突然宣布中途棄車,丟低教院正名心願,相信會惹來一班師生議論紛紛。不過,張炳良就話院校政策並非校長一人決定,話離任唔會影響教院正名,估計教院正名仲需要兩年時間喎。為了應付新學制,佢仲搵咗現任副校長鄭燕祥做署理校長,嚟緊再全球招聘新任校長。

拒談「新崗位」職務

至於消費者委員會主席、房委會資助房屋小組委員會主席等公職,張炳良就話會繼續做住先,而行會成員個位就要等新政府決定喎。問到「新崗位」係乜?張炳良重申未係時候講住,但就話新工充滿挑戰。再問佢係咪會離開教育界,佢不置可否,只強調「一日係教授,一世都係教授」喎,仲話好唔捨得教院,將來即使做乜嘢都會心繫教院,繼續關注教院正名。如果張炳良日後成為新政府內閣,唔知協助教院正名會否更加好辦事呢?

第一手消息請下載on.cc東方互動iPhone/iPad/Android/Windows Phone Apps

搵樓18即睇最新樓價走勢、最全面地產新聞及筍盤情報